कविता : ..ठाऊक नाही

संवादावे कसे? उभयतां ठाऊक नाही!
संवादाचा वाद कशाला? ठाऊक नाही! 🙂

तिच्याचसाठी सर्व करावे.. आंस मनातील!
सर्वव्यापी ती उर्मी कुठली? ठाऊक नाही! 😎

प्रेमासाठी झुरणे म्हणजे प्रेम म्हणावे??
प्रेमाचा मज अर्थ मुळातच.. ठाऊक नाही! 😏

धरणीसाठी अमृत होतो पाऊस, तेव्हा..
कधी संपला विरहग्रीष्म, तिज ठाऊक नाही! 😊

तेल-वातीच्या जळण्यामधुनी ज्योत तेवते..
पतंगांचे महत्त्व तिज मग.. ठाऊक नाही!! 🔥

प्रत्येकाचा कृष्ण, मनांतील, सांगत असतो..
ईश-प्रेमाला अंतर कुठले ठाऊक नाही!! 😇

--

रतीब आहे शब्दांचा पण अर्थ निसटतो..
ह्या कवितेला शब्द बंधने.. ठाऊक नाही! 😉

राघव

टीप  :  ही रचना मिपा दिवाळी अंक  २०२० मधे प्रसिद्ध.

[ २०२० ]